話說香港中華廠商聯合會早前捐咗三千萬元畀理工大學，尋日舉行「香港中華廠商聯合會樓」命名儀式時，會長Irons施榮懷自爆同理大嘅淵源。原來佢喺五年前，曾經修讀過由岑逸飛執教嘅「易經與工商業管理的關係」課程，每個禮拜都要返理大上一節三個鐘嘅課，讀咗足足成四個月，所以對理大都算有感情喎！

廠商會副會長陳淑玲（右起）、施榮懷、唐偉章同理大大學顧問委員會主席鍾志平主持大樓命名儀式。

咁學完易經之後，對人生有乜啟示？Irons話易經好複雜，讀完只係有個基本概念，例如乜嘢係陰陽調和，好似近排愈嚟愈深嘅中港矛盾，就係陰陽失調嘞，大家應該諗吓點樣平衡。佢仲話過年前去澳門都試過畀啲篋轆到隻腳，但條街咁窄好難免，惟有互相包容，換轉係自己去到外國被當地人驅趕都會唔開心咁話。

講番個儀式，施榮懷致詞時話最鍾意飲甜湯，事關理大校長唐偉章英文名係Timothy Tong，所以唔捐畀理大都唔得啦。咦！咁唐偉章咪同「貪湯」前廉政專員湯顯明個英文名一樣？唔知校長有冇覺得好冇面呢？

第一手消息請下載on.cc東網iPhone/iPad/Android/Windows Phone Apps