政壇：荃灣行花市 CY全身而退

政務司司長林鄭月娥同政制及內地事務局局長譚志源，早前分別落旺角花墟同維園行花市時，就分別遇上示威同畀人掟膠屎玩具，搞到高官行花市變成高危活動咁。特首CY梁振英尋日去咗荃灣沙咀道嘅年宵市場買年花，但冇事先通知傳媒採訪，令佢可以無穿無爛，全身而退。

梁振英尋日去咗荃灣花市買年花，期間同一班幼稚園學生合照。

CY尋日喺多名新聞處人員同警員陪同下，落咗荃灣沙咀道花市買年花，行咗短短半個鐘，就先後同大批一同行花市嘅市民、老人家、幼稚園學生同檔主握手影相，最後仲買咗日本海棠、富貴子、火鳥同一帆風順四款年花，一共使咗六百二十八元。

佢事後發表網誌，話唔事先通知傳媒，係因為唔想有人喺新聞界前博出位而刻意衝擊，影響到啲檔主同行花市嘅市民。對於譚志源前日喺花市畀人掟膠屎，CY強調香港社會絕對唔會容許衝擊法律底線嘅行為。