潮語「翻啅」有幾重意思。「啅」係港式粵語，一般嚟講即係食咁解。「翻啅」就係指再食。食當然唔係淨係指吞食，而係據為己有。如果你同伴侶分咗手，再次向他或她重新展開追求，又或者成功向前度要求一夕歡好，回味一下往日情意，都叫「翻啅」。或者，你離開咗一間公司，然後舊老細重金禮聘你回巢，最後你重返舊崗位，都可以叫「翻啅」。此外，當你食髓知味，有些事情你做一次唔夠，而要再做多次，甚至再多幾次，不能自拔，都可以叫「翻啅」。

常言道好歌不厭百回聽，好嘅嘢真係唔怕重溫重溫再重溫。但係話雖如此，喺創作空間被扼殺嘅今日，要造就新嘅經典，真係好難。再加上今時今日，資訊爆炸，互聯網彈指之間，全世界所有新事物都盡收眼底，新創意而又可以成為經典嘅嘢真係買少見少。全世界不斷地出續集再續集，經典電影拍完又拍。套用捷克作家米蘭昆德拉嘅名句，呢個世界就係「永劫回歸」一樣，所有嘢就係不斷重複重複再重複，無限Loop。

剛收到朋友送上嘅馬年利是封，上面漂亮嘅斑馬紋圖案底部寫着來年的歲次，原來又是甲午，即是當年中日之間嘅海戰已又經歷一個甲子，即係已經一百二十年。今時今日中日在釣魚島嘅爭端仲未解決，當然日本已經無可能再「翻啅」中國。但係，一百二十年後嘅今日，竟然中日仲係互相爭鬥，到底中日間幾時先至會有真正和平？

記得政府禁毒宣傳片有一句名句係「不可一、不可再。」有啲嘢真係唔可以再「翻啅」。除咗毒品之外，我諗唔可以「翻啅」嘅，就係投票畀啲出賣港人嘅偽民主政黨！

第一手消息請下載on.cc東網iPhone/iPad/Android/Windows Phone Apps