SUN搞作：少膽虫手記：打野戰發洩
「啪啪啪啪！」喺淫賤黎猛烈進攻下，身在下方嘅少膽虫喘氣道︰「腦細，好痛呀，快啲停呀……」淫賤黎見少膽虫一臉痛苦，快感油然而生，「我都唔想，支槍唔受控制走火，左揈右揈，惟有我發洩，你忍受。」黑夜之中慘遭蹂躪，少膽虫呆呆哋回想起尋日嘅情形，真係悔恨不已……
「少膽虫，聽晚一齊去打野戰！」聽到淫賤黎嘅提議，少膽虫真係嚇到眼都凸埋，心諗︰「早兩日先有單『打野戰』見報，唔係咁激吖？」笑吟吟嘅淫賤黎，見少膽虫面有難色，自然加多兩錢肉緊，「兩個人玩好刺激，人一世物一世，真係要試吓！」講呢啲，少膽虫點會信呢，「腦細，放過我喇，我唔想畀人拍片做網絡紅人。」淫賤黎搔搔頭，「乜玩war game都有人拍片咁正！有得做紅人，打死都要玩。」少膽虫一聽，即刻放低心頭大石，爽快咁應承腦細。
第二晚，淫賤黎成副武裝現身，仲叫少膽虫企喺低位。「腦細，我啲裝備呢？」少膽虫兩手空空，大感奇怪。閃電間，數十子彈直射少膽虫，「少膽虫，你點會有裝備？呢排《爛果》作嘢頻出事，搞到我心都煩，依家仲唔靠射嘢嚟宣洩吓咩？」
