城中鏡：王英偉升呢博士
喺過去十年，港區全國人大代表Wilfred王英偉先後兼任浸會大學校董會主席及副主席，每年畢業禮都會向唔少社會傑出人士，進行俗稱「扑頭禮」嘅學位頒授儀式。習慣扑人頭嘅Wilfred今年換上另一個身份，同表內姪、全國政協委員Kennedy黃英豪分別獲頒榮譽人文學博士同榮譽法學博士，兩人雙雙被扑頭，二人不約而同高呼「世事真奇妙」！
王英偉（右）膺博士，太太簡美蓮（左）同外母（中）梗要到場支持。
王英偉終於一嘗「被扑頭」嘅滋味。
黃英豪（左三）獲頒博士，爸爸黃乾亨、媽媽（左一、二）都嚟支持，捧場嘅仲有右起：女兒、妹妹同太太。
往昔片段湧番晒出嚟
浸大尋日舉行第五十四屆畢業禮，剛卸任校董會主席嘅Wilfred憑藉多年來對浸大嘅貢獻，同埋兼任多個公職等傑出政商成就，今年更進一步成為榮譽人文學博士。
對於第一次「被扑頭」嘅心情，Wilfred笑言過去扑人頭嘅片段就好似倒帶咁喺腦海入面湧番晒出嚟。
Wilfred透露，想當年曾經向唔少著名教授頒授名銜，就連國務院前副總理李嵐清、全國人大常委會前副委員長許嘉璐都要喺扑頭禮向佢俯身，認真巴閉。
體諒王梓軒無暇觀禮
雖然緬懷昔日嘅光輝，但Wilfred補充自己都好想一嘗被扑頭嘅滋味，而尋日終於如願以償，更獲父母、太太、兩個細佬同弟婦及公司唔少高層都現身撐場。其歌手囝囝王梓軒就因趕住開騷，做完司機接送媽咪到會場就靜靜雞走咗。囝囝以工作為重，Wilfred當然體諒冇詐型啦！
獲頒榮譽學位嘅仲有資深外交家兼中國外交學院教授吳建民，吳教授過去多次來港交流，坦言內地學生嘅個人發展同創意教育都唔及本地學生，決定利用過去多年嘅外交人脈穿針引線，吸納海外精英學生赴內地交流，當中不乏本地學生。其餘獲頒榮譽博士學位嘅仲有內地著名藥物化學家陳凱先以及耶魯大學教授宋惠慈。
