前政務司司長唐英年位於九龍塘約道大宅嘅僭建地庫，復修工程已進行多時，最近唐唐大宅再有異動，現場所見，整幢大宅被帆布遮蓋，建築物外牆都包到實一實，唔通工程並非填平「地下唐宮」咁簡單？甚至乎引人好奇係咪想拆卸重建呢？唐唐嘅發言人就話，有關工程只係按照當局批出嘅復修工程進行，有帆布封住都係為工程安全着想喎。

唐英年九龍塘約道大宅搭晒棚，兼用帆布遮蓋整幢建築物外牆。

唐英年大宅復修工程，棄置好多建築物廢料。

唐英年

保安阻影相 工人反拍

唐唐位於九龍塘嘅大宅圍封多時，究竟家吓復修成點呢？早前有報料人話有異動，我哋亦專登去現場巡吓，正如報料人所言，依家大宅搭建咗棚架，然後有帆布遮蓋建築物外牆，另外就係部分已拆卸嘅石屎同鋼筋棄置一旁。偌大嘅工地上，唔見唐家相關人士出現。

我哋向現場嘅工人查詢工程進度，佢哋不但守口如瓶，半句話都唔講，見到陌生人行近大宅拍照更加倍警惕，更有保安人員出言喝止，甚至有工人用相機反拍。

其實，有關唐宮復修工程，當事人唐英年都唔止一次公開交代喇，現場人員嘅反應會唔會過咗火呢？唐宮復修多時，完工時間表至今卻眾說紛紜，有人推算最快本月底就可以完工，但現場所見，似乎未有咁快噃，估計距離完工仲有一段時間。

第一手消息請下載on.cc東方互動iPhone/iPad/Android/Windows Phone Apps