政壇：搞搞政：三散人拒受綁唔黐政黨
雖然好多立法會議員早前趁住放暑假外遊充電，原來喺嗰段時間，建制派內部曾出現多輪獨立議員爭奪戰，被外界歸納為「三散人」嘅旅遊界姚思榮，建築、測量及都市規劃界Tony謝偉銓同保險界陳健波向來非常搶手，但最終佢哋都係維持自由身，唔受綁。
設計圖片及對白
據知新民黨同經民聯都有向Tony同陳健波摸底，當中尤以經民聯最為積極，皆因佢哋諗住兩個「梁粉」加盟後可「溝淡唐營色彩」。面對兩黨極力游說，兩人喺復會後都有相約坐低認真討論係咪強勢入黨，但經一番討論後決定暫時維持獨立身份。Tony透露，兩黨先後搵過佢哋幾次，個別黨派更派人連番接觸佢，又同佢講話入黨後會有好多支援，唔使一個人睇晒所有政策咁辛苦。雖然對方「三顧草廬」猛咁邀請，但佢仍不為所動，寧願繼續「單身」唔埋堆。
至於姚思榮，據了解富貴黨同經民聯都曾力邀佢加盟，而部分支持佢嘅資深旅遊界人士，亦曾建議佢揀番個政團埋堆，免得喺議會內單打獨鬥。姚思榮嘅意向好堅定，佢考慮過後，覺得加入現有建制派政團，不但幫唔到佢喺業界加分，反而會招來麻煩同爭議。
