政壇：馬雲搞「賞月保險」發小財
細個嘅時候課本經常形容月亮皎潔，呢個中秋大家終於見識到，乜嘢為之皎潔嘅月亮，由迎月到追月，個月亮靚到暈，咁由淘寶保險喺中秋節前推出嘅「賞月保險」，咪發咗個「中秋財」？咦！創辦人馬雲咪都幾有諗頭喎！
馬雲好有諗頭，搞賞月保險賺咗筆小財。（資料圖片）
「賞月保險」嘅玩法，只要你喺中秋當晚因為天氣關係而睇唔到月亮就有得賠。根據中秋正日嘅夜晚八點至追月嗰日凌晨兩點嘅天氣報告，喺「賞月險」包括嘅四十一個城市入面，只有西安、成都、溫州、大連等九個城市係屬於陰雨天氣，即係話四十一個城市入面，只有喺呢九個城市買咗「賞月險」嘅網友，先可以獲得一百八十八元人民幣（下同）嘅賠償，其餘三十二個城市，一律冇得賠呀！
全中國一共有五千一百五十四人買咗「賞月險」，但其中只有百分之九嘅買家得到賠償，推出保險嘅安聯財險當然發咗個小小嘅「中秋財」啦！
可能大家都估到中秋節嘅天氣唔錯，所以全國只有五千多人買咗保險，安聯財險收到嘅保費有四十萬元，而今次嘅賠償金額只係八萬七千元，帳面計落安聯財險已經賺咗三十二萬元！老實講，投保人寧願中秋賞月，都唔想收一百八十八蚊賠償啦！
