平等機會委員會尋日舉行論壇，聽吓公眾意見，白鴿黨立法會議員「一舊雲」黃碧雲同埋人民力量議員「慢必」陳志全都有去。人哋平機會話到明畀大家發表意見，之不過一舊雲發言時，就講番自己喺立會唔同委員會嘅工作跟進，唔知仲以為佢發表緊工作報告，擺明抽水啫！

一舊雲發言開頭都好哋哋，話好多政府部門當平機會無到，希望平機會將來要做隻「有牙老虎」，點知跟住佢就不停咁講自己嘅政績，先話自己喺立會教育事務委員會，要求教育局跟進過學校性騷擾，又話喺政制事務委員會跟進性別歧視，足足提咗「立法會」三次，查實拉票係咪應該去其他地方呢？

而身兼政府性小眾諮詢委員會嘅慢必，發言都貼題啲。佢話反對為性傾向歧視立法嘅人，或者係被誤導，質疑點解平權法會變成惡法，希望出嚟話法例會荼毒青年人嘅家長要「愛孩子、勿歧視」。嗱，呢啲咪係高手同低手之分囉！

第一手消息請下載on.cc東方互動iPhone/iPad/Android/Windows Phone Apps