唔少內地科網公司都「踩過界」踏足金融市場，成功例子就有阿里巴巴集團旗下嘅餘額寶，呢個基金嘅總投資金額據講剛剛突破五百億元人民幣，令到唔少公司心郁郁想做埋一份。好似百度李彥宏，自然亦不甘後人，最近就畀人發現佢哋靜靜雞註冊咗一個網站，可能係想借機做埋互聯網金融喎！

李彥宏似乎有意踏足金融市場。

有心水清嘅網民發現，百度旗下嘅網上支付公司「百付寶」，最近就註冊咗tongchibao.com呢個網站，雖然暫時上唔到呢個網，但網站嘅IP地址就指向百度，亦有資料顯示網站嘅註冊人就係同百度相關嘅人員。此外，網站網址似乎係普通話拼音，譯音可能係「通吃寶」，加上之前又傳出百度想搵基金公司合作，睇嚟百度真係好有心想做金融生意喎！

照計，百度已喺互聯網界做到咁好成績，如果連金融生意都做埋，咁就真係「通吃」喇！

第一手消息請下載on.cc東方互動iPhone/iPad/Android/Windows Phone Apps