政壇：沉默之聲「赤腳」撐國教
雖然國教風波過去咗一年，但心水清嘅人都應該記得，舊年同學民思潮打對台、力撐德育及國民教育科嘅「沉默之聲」，佢哋嘅總幹事陳健燊尋日宣布，呢個星期六下午四時，喺中環皇后像廣場空地舉辦支持國教一周年大會，邀請反佔中行動嘅幫港出聲召集人之一何濼生、基本法委員會委員劉迺強等「自己友」出席，鼓勵市民喺日常生活推廣國民教育意識。
沉默之聲負責人尋日「赤腳」開記者會，左起陳健燊、萬家強及鍾慕蘭。
雖然愛港之聲已申請註冊為社團，兼以愛國中產為目標群眾，但都要靠幾位領導層「泵水」支持，資源唔見得好充裕，好似副主席鍾慕蘭就負責借出一間遊戲輔導室舉行記者招待會，結果就出現咗大家齊齊「入屋除鞋」嘅場面，好似小朋友返playgroup咁喺軟膠墊上傾正經事，實行「赤腳」上陣撐國教。
