競爭排名大落後 香港一味食老本
香港同新加坡被視為現代「雙城記」，無他嘅，事關呢兩條亞洲四小龍曾經一時瑜亮，經濟發展並駕齊驅，所以咪成為互相競爭嘅對象囉。不過，呢個雙城記傳奇可能已經成為絕唱，香港近年江河日下，節節後退，畀星洲拋離幾條街，仲邊有得鬥吖。
嗱，太一叮唔係空口講白話o架。世界經濟論壇發表最新全球競爭力報告，喺一百四十八個國家及地區中，香港排名雖然升咗兩級至第七位，但依然遠遠低於排名第二嘅新加坡，簡直係相形見絀。仲有吖，新加坡早前公布十年發展宏圖，又大興土木建屋安民，又擴建機場拓展航運，又改革教育提升競爭力，反觀香港仲陷於政治泥沼難以自拔，根本冇人關心經濟及民生發展，遲啲可能被拋離到食塵都無份呀！
究竟香港出咗乜嘢問題，搞到競爭力大落後呢？報告係咁講嘅，香港喺基建設施及金融市場發展方面表現理想，穩居全球排名第一，但最大問題係欠缺創新能力，其次係受制於低效率嘅官僚主義及政策不穩定。明晒喇，香港淪為雙城記輸家，原因就係八個字：港府無能，創新無計！
其實，香港經濟結構單調，創新乏力，唔使報告提醒，香港人早就有切身感受。港產官僚講就天下無敵，做就有心無力，將經濟轉型吹到天花亂墜，到頭來一事無成，來來去去獨沽一味，唔係炒樓，就係炒股，試問咁樣點同人競爭吖？俗語話坐吃山崩，香港話就話老本雄厚啫，但唔食得幾耐嘅咋，如果港產官僚繼續不思進取，胡混度日，香港遲早食西北風都似。
至於講到港府官僚主義低效咯喎，更加係陳年頑疾啦。正如北大人話齋，港產官僚嘅施政特色就係議而不決，決而不行。就講香港比較有優勢嘅基建設施吖，你估係港府功勞咩，係英國人打下嘅根基夠深厚咋。有人話，如果赤鱲角機場唔係殖民地時期興建，可能今日仲喺度拗緊應唔應該起呀，簡直係一語中的。
正所謂，沉舟側畔千帆過，病樹前頭萬木春。周邊城市發展一日千里，香港嘅競爭對手又點止新加坡一個吖。呢，上海已獲中央拍板設立自由貿易區，意味着香港末日就快到，點知港產官僚依然得過且過，若無其事咁，真係服咗佢哋。咁搞法，香港想唔邊緣化都幾難啦。
當然，香港搞成咁，港府固然難辭其咎，政客亦有責任。香港由經濟城市淪為政治城市，成日紛紛擾擾，吵吵鬧鬧，點可能有運行吖，叮！
