政壇： 林老師「精神奕奕」落口供
在旺角街頭爆粗辱警嘅小學教師林慧思早排自稱「精神壓力好大」，向佢任教嘅小學請咗一個月病假，照計處於「休養中」嘅林老師卻連日出動，尋日去咗佢嘅代表律師、前泛民立法會議員鄭家富嘅律師樓，就上月底喺網上遭恐嚇案件同警方落口供。鄭家富仲喺社交網站透露林慧思「精神奕奕」，喺落口供前同律師研究案情，唔怪得口供落足三個鐘都冇有怕。
林慧思
林慧思已經唔係第一次受到恐嚇，今次落口供係事緣有個叫Ken Kou嘅網民，上月底喺Facebook（FB）留言辱罵林「太囂張」，恐嚇「到時你便知甚麼叫死無全屍，永不翻身」，嚇到林慧思第二日留言，透露自己同屋企人壓力大到「炸彈已爆發出來，老公走掉了」，好彩老公仔隔咗幾個鐘已經返屋企。
據鄭家富引述警方消息指，仲要調查留言者係Ken Kou本人抑或係FB戶口被盜用先得。其實林慧思上月中已就有網民恐嚇佢「你唔辭職呀？我實搞X你！」報警同落口供。但難得林慧思被連番恐嚇仲咁精神，都係快啲返學，班學生等緊你上堂呀！
