政壇：葉劉對女模黨員困惑
本地政黨向來缺乏年輕女性參政，若有青春美少女加入，政黨通常都樂意栽培，無論係寄望靚女黨員吸納新成員、定係建立黨嘅活力形象都好。不過新民黨主席葉劉淑儀近排就好困惑，事關新民黨多咗個年輕模特兒黨員，佢就係中國小姐選舉出身嘅趙哲妤（Uny）喇！據聞葉太對Uny衣着暴露有微言，嫌佢經常拍攝性感衣着廣告，覺得佢大行性感路線會拖累黨形象，仲有講話葉太手袋專登保存一張Uny極性感嘅剪報，不時拎出嚟同人呻話好羞家。
設計圖片及對白
為黨推走六位數工作
Uny未入政黨前，經常接拍三點式泳衣同婚紗廣告，葉太一早對佢入黨有微言，聽聞有一次連民政事務局局長曾德成，都專誠問葉太點解收埋呢啲黨員，搞到葉太唔知點答。Uny就話知道葉太唔想佢咁性感，亦都明白黨內有唔少反對聲音，但自己真係好鍾意服務社會，所以入黨後已拒接所有比堅尼工作，就算早前有美容院以六位數字利誘佢拍三點式廣告，Uny都不為所動，以行動證明自己聽黨話。
Uny仲好識講嘢，佢話如果葉太手袋真係有佢剪報，證明個黨重視佢，覺得呢個反而係鼓舞。但Uny話自己作為模特兒，行性感路線係工作一部分，好難一下子唔性感，但既然應承咗葉太唔會接比堅尼工作，就會貫徹到底，最多都係着性感婚紗算數。Uny又強調自己雖然選美出身，但唔好以為佢得個殼，佢話大學時主修新聞系，向來對社會時事有濃厚興趣，就算天熱企街派傳單都無問題，總之一定瞓身服務街坊。
新民黨支持同性平權，葉太又係前高官兼喺美國大學浸淫多年，無理由思想咁保守o架！點都好，Uny依然決定走性感路線，葉太睇怕要繼續高度「關注」佢囉！
