城中鏡：歐陽長恩驚巴西世盃爛尾
證監會前高層Peter歐陽長恩年初過檔賽得利做財務總監，仲去咗巴西視察業務添！出年世界盃就喺巴西舉行，Peter「巡視」過當地設施後，好擔心係咪應付到世界盃。
歐陽長恩擔憂巴西係咪應付到舉辦世界盃。（資料圖片）
Peter話里約熱內盧呢個巴西最大嘅機場，望落去規模唔細，但就舊到好似以前嘅啟德機場咁，同依家好多現代化機場，真係無得比。而且巴西近排咁多示威，治安問題都幾令人擔憂，Peter話喺巴西第三大城市落機去酒店，只係二十分鐘車程，就有兩個檢查站，咁當地治安係點就可想而知啦！聽完佢嘅形容，似乎球場同其他基建配套都好似仲未搞得好，巴西呢次搞世界盃真令人擔心。
