政壇：反日示威被抽水阿牛火起
多個團體趁住尋日八‧一五日本戰敗紀念日，輪流去日本駐港總領事館示威。聲稱由網民發起、但有多位愛港之聲成員參與嘅「歷史監察，網民自發」，尋日都有夥拍保釣行動委員會等民間團體去中環和平紀念碑獻花，但佢哋花都未獻，就舉起「太平盛世，何必佔中？」標語宣傳反佔領中環訊息。
「歷史監察」組織先畀人質疑借反日抽水，後被揭發唔少成員係愛港之聲骨幹成員。
見到咁嘅情況，保釣行動委員會嘅「阿牛」曾健成即時無名火起，上前指罵對方係「走狗」、「賣國賊」，又揶揄叫對方「去打日本仔」。畀阿牛咁鬧法，「歷史監察」一眾示威者即時頭耷耷行開，等阿牛等人走咗後先出番嚟接受記者訪問。
召集人李美娜否認自己同其他成員與愛港之聲有任何關係，而有份示威嘅疑似愛港之聲成員彭春娥就話自己早已退出愛港之聲，現時係以獨立身份參加「歷史監察」活動。被問到幾時退出同離開原因，彭春娥就三緘其口，淨係話覺得呢個係明智決定喎！
