大難臨頭各自飛 眾叛親離最可悲
俗語話，夫妻本是同林鳥，大難臨頭各自飛。有啲人可以同富貴，唔可以共患難，一有危機就各自分飛，作為人生伴侶嘅夫妻尚且係咁，政客就更加唔使講。呢，又有高官跳船逃生喇。
發展局政治助理何建宗啱啱走咗一個禮拜，港府又證實勞福局政治助理莫宜端已提出辭職，將於本月二十四日離任。何建宗就話因為被踢爆漏報利益而焗住辭職啫，莫宜端又因乜事劈炮呢？講出嚟真係好笑，佢話要照顧一對仔女喎，你信唔信吖？正如學者話齋，莫宜端喺上屆政府已經出任政助，早就知道工作性質及工作量，如果真係要照顧仔女，都唔會等到依家喇。
冇錯嘞，離開容易留低難呀，梁振英管治班子走完一個又一個，搞到分崩離析，天殘地缺，唔係冇理由o架。運房局局長張炳良曾經慨嘆，現屆政府開局不順，環境比想像中惡劣，日日返工都好似打仗咁。嗱，呢個咪就係高官爭相逃亡嘅真正原因囉，今時今日管治環境惡劣，港府民望不斷插水，跟住落嚟仲有佔領中環，政治風暴一觸即發，唔係個個高官都鍾意打仗嘅咋。
講起真係可悲，梁班子上場短短一年就損兵折將，麥齊光、張震遠、林奮強、何建宗、莫宜端……咁搞法，都唔知點樣繼續捱落去。最諷刺嘅係，管治班子本來已經軍心渙散，士無鬥志，當局仲要喺呢個時候推出新指引，要求問責官員巨細無遺申報所有個人利益，搞到有人更加意興闌珊，想唔離開呢個熱廚房都唔得喇。
即係咁，要求官員申報利益，避免再發生好似發展局局長陳茂波囤地醜聞，本來係無可厚非嘅，問題係連「私交好友」嘅利益都要申報，咁就真係令人無所適從喇，人人都有親朋戚友，個個都有人際網絡，稍一不慎隨時中招，唔只累己仲要累人，所以咯喎，有人選擇抽身而退都好正常啫。
計太一叮話齋，人必自侮而後人侮之，港府淪落到咁嘅地步，講嚟講去都係咎由自取，與人無尤。現屆管治班子先天不足，後天失調，本來已經動輒得咎，寸步難行，點知港產官僚仲要敵友不分，倒行逆施，卒之搞到眾叛親離，剩下孤家寡人，簡直係自取其辱，唔衰攞嚟衰。
屋漏偏逢連夜雨，依家嘅港府就好似一艘千瘡百孔、周圍漏水嘅破船，風雨飄搖，載浮載沉，隨時有滅頂之災。有啲高官唔想成為陪葬者咯喎，自然要及早跳船喇，睇怕逃亡者仲陸續有來。嗱，大家不妨估吓，跟住又輪到邊個呢？
