政壇：鄉紳呻波波阻人發達
新界東北發展計劃風波不絕，一眾鄉紳一直出力支持，其中上水鄉事委員會主席侯志強仲因發表「廢人論」為捲入利益衝突疑雲嘅發展局局長陳茂波護航，畀人質疑佢力撐新界東北同瞓身「護波」，係為咗賺取收地賠償。
不過有鄉紳就同我哋呻，其實佢哋都為新界東北發展犧牲咗好多，未賺先蝕，陳茂波事件更加谷到佢哋一肚氣，如果換局長可以幫到計劃推進，佢哋一定會舉腳支持。
有關計劃推動以來，鄉紳不停力撐，但政府就被指臨時縮沙，將坪輋剔出首階段發展範圍，令該區村民見財化水。有鄉紳指出，反對人士唔會因為縮窄發展範圍而變為支持計劃，但原先支持計劃嘅坪輋居民，就會因為喪失發展機會而轉為反對，政府咁做係自製敵人，蠢到冇朋友。
至於陳茂波事件，班鄉紳私底下鬧得比泛民更兇，其一係鄉事派對發展局早前嚴打村屋僭建仍耿耿於懷，其二係將來政府想回應村民訴求提高賠償金額時，實會因今次事件而被指明益局長外家，令所有村民受害。所以佢哋心底都期望陳茂波自己識做盡快辭職，畀新界東北計劃重新上路，唔好阻住大家發達。
