城中鏡：百忙揀靚酒 蔡加讚好客

Karson入到酒舖，店主隨即熱情上前招待Karson，大家交流一陣後，店員挑選咗幾支白酒向Karson介紹。Karson拎起研究一番，似乎對支酒好滿意，好爽快買咗三支就離開。我哋上前同Karson打招呼，問佢買嘅係咩酒？佢就話係餐前酒，諗住見客傾生意時用喎。佢話，知道對方有飲用餐前酒嘅習慣，但佢屋企就冇存放餐前酒，所以特別過來買幾支，諗住投其所好，傾成生意嘅機會都高啲。佢笑言，自己對餐前酒冇乜研究，所以都係聽店主介紹咋，三支酒一共二千元，都算超值。

講起婚事，Karson不期然泛起甜笑，佢話依家仲積極籌備緊，場地已經定咗喺灣仔會展，至於擺幾多圍，佢就賣個關子嘞。Karson喺愛情與事業之間兩頭忙，竟然連餐前酒都親力親為去挑選，睇嚟唔止抵讚，應該「加讚」至啱。