消防瘋狂違紀 部門形象掃地

無冤枉佢哋o架，本報獲得消防處一份上月發出嘅《總部行政通告》，踢爆過去一年有八十六名人員因違反紀律遭到處分，幾乎每百名消防員就有一人違紀，咁樣嘅紀律部隊大家見過未吖？至於違紀行為就多姿多采咯，秘撈、欠債、當值時賭博、毆打同袍、酒後駕駛、教官無按時執教……總之正常打工仔唔敢做嘅，佢哋都做齊晒，問你服未。

本來呢，錯就要認，打就要企定，既然違反紀律咯喎，梗係要接受處分啦。問題係消防處不愧係一支上下齊心嘅無紀律部隊，下面亂咁嚟，上面亂咁罰，簡直講都無人信。就以秘撈為例吖，有人被豉椒炒魷，有人只被「譴責」了事，咁即係大細超啫，消防官僚唔止管理混亂，懲罰更亂，唔係無能又係乜呀？

更恐怖嘅係，消防處管理層唔止無能，更加無品，被前線員工質疑公報私仇，打壓異己。事緣內部瘋傳前線人員因早前爭取工時問題而遭部門「搞」，隨時連升級都冇份，咁又算唔算係秋後算帳，製造白色恐怖呢？

嗱嗱嗱，講到消防處製造白色恐怖，大家見慣嘅喇。消防官僚救火救人烏龍百出，但係講到製造白色恐怖咯喎，無人夠佢哋勇猛。早前之嘛，以收到一封電郵投訴為由，高調派人踩上報館滋擾，咪就係製造白色恐怖，打壓新聞自由囉。太一叮諗極都唔明，消防處醜聞多多，唔係員工違紀就係救援設備跪低，唔係被市民批評救援不力就係被法官炮轟推卸責任，正式係火燒後欄，周身唔得閒，點解仲要不務正業，滋擾正義傳媒呢？唔通嫌自己仲未衰夠？正所謂，司馬昭之心，路人皆見，消防官僚打壓新聞自由簡直已到咗明火執仗嘅地步，小心引火自焚呀！

一句講晒，消防瘋狂違紀，部門形象掃地。消防處醜聞不絕，本來已經衰到貼地，今次員工違紀檔案曝光，再次證明包括處長陳楚鑫在內嘅管理層無德無能，嚴重失職，必須懲處。至於罰則咯喎，梗係唔止譴責咁簡單啦，嗱，今次咪再大細超嘞，一於將所有瘀血清除啦，叮！