政壇：郁亮楊元慶膺最貴CEO
內地經濟急速發展，企業管治水平同管治人才嘅收入都漸漸貼近國際水平。《福布斯》發表今年中國企業最佳CEO（行政總裁，內地又稱執行官），民生銀行（01988）行長洪崎掄元；至於最貴CEO就分別係萬科總裁郁亮同聯想（00992）總裁楊元慶。楊元慶以八千九百五十九萬元人民幣成為最貴中資港股CEO，其中一半收入來自股權報酬；郁亮去年嘅薪酬則以一千三百六十八萬元人民幣稅前所得創市場新高，成為最貴嘅A股CEO，仲破埋自己對上一年嘅歷史紀錄。
至於被評為最佳CEO嘅洪崎，舊年都「只係」袋咗五百三十四萬元人民幣，點解《福布斯》選佢為最佳呢？原來《福布斯》講明好嘅CEO唔可以只講短期盈利，要睇三年表現，民行最近三年股價就增長百分之一百八十九，相比起其他表現平穩嘅內銀，民行近年盈利的確係升得好快。今年嘅最佳CEO第一次有女士入三甲，佢就係排第三嘅格力電器CEO董明珠。
