常有貸款公司來電提供特惠低息貸款，條件好到好似唔使還咁上下，一話無乜需要借錢，佢就愈發想借畀我；因為我真係唔等錢用，惟有好言婉拒。

有頭有面政壇紅人，生意開口埋口十億八億，據聞周轉不靈，急於向外舉債，豈料財不入急門，大額借唔成，只能向口沒遮攔的前議員籌得幾百萬元，被人背後笑到面黃，仲畀人揶揄話呢個人拎張卡片出來都應該可以借到二、三百萬，不過要二十厘息！虎落平陽，莫過於此。終於所需款項未能到位，牌照都要畀番人，仲可能惹上官司，唔知啲貸款公司去晒邊度。

現代人時興先使未來錢，依賴借貸度日，連一向保守的荷蘭人人均借貸率竟達收入和資產的四倍！不知是有其民便有其政府，抑或有其政府才有其民，不少強弱國家和大小政府都是債台高築，借下天文數字的國債，最終連世界銀行都唔敢去追收，事關一郁便可能引發全球金融風暴。

咱們特區政府得天獨厚，一直點鐵成金，赤字變盈餘，從來無需舉債。然而政府宣布再次發行一百億元債券，依常理推斷便是政府等錢使，因而發債；事情卻並非如是，庫房水浸又不願無端派錢，乃通過發債形式，派息代替派錢，市民只要能夠負擔買債成本，政府便每年派發不低於通脹的利息，有錢有得派，無錢無得傾，中產友好必須好自為之。