最近網上流傳一幅相，一個埃及古蹟竟然畀人塗鴉地刻咗幾隻中文字！嗰幾隻字係某某到此一遊之類。呢幅相當然即時喺網上瘋傳，無論中外網民都齊聲大罵寫字嘅人，覺得呢件事簡直係令中國人蒙羞，係國家級嘅恥辱。雖然中國同埃及都係四大文明古國之一，但係今時今日埃及同強國相比，國力真係差天共地。嗰位強國遊客可能因為咁，就忍唔住手喺人哋嘅神廟度賜字，畀啲外國蠻夷知道中華文明係比其他文明優勝。呢個只屬個人推測，不過經過網民「人肉起底」之後，搵出呢位塗鴉人士，原來係來自南京一名中學生丁錦昊！

塗鴉相片喺網上曝光不過一兩日，網民就可以搜索到寫字嘅到底係咩人咩身份，真係不得不佩服網民嘅效率，呢啲就係潮語所謂「人肉起底」。

「起底」本來係社團同警方嘅共同術語，意指追查對方的底細要靠「人肉」去跟蹤或去翻查過往紀錄。不過，依家嘅「人肉起底」就變成網民嘅潮語，係指網民各自發功，經互聯網去追查某個人嘅資料，並讓其身份、地址、照片、工作地點甚至父母兄弟老婆情人等資料曝光。

香港某討論區嘅「起底組」更係以此為傲，並覺得呢種「人肉起底」係伸張正義嘅行為。經典事件除咗早年「巴士阿叔」及「陰公男」，仲有近年好多喺網上大放厥詞嘅愛國愛港人士，好多都已被「人肉起底」。

話說呢個南京塗鴉少年丁錦昊被起底之後，佢嘅父母已經公開道歉，埃及當局亦已經修復被破壞嘅古蹟。但從呢件事嚟睇，雖然強國嘅GDP係全球第二，但國民質素始終仲係徘徊喺發展中國家嘅階段，就算同香港整體嘅公民質素相比都仲有一大段距離。你話香港人同強國人今時今日同處一個咁細小嘅城市，有咩可能會冇衝突呢？

第一手消息請下載on.cc東方互動iPhone/iPad/Android/Windows Phone Apps