政壇：政商定格：陳光明熱廚房做義工
陳光明（左）走入熱廚房做義工，董愛麗陪佢一齊刨瓜皮。
出身富裕之家嘅潮青名譽參事Johnny陳光明，繼早前參加電台節目《窮富翁大作戰》，親嘗執紙皮、住籠屋滋味，日前又跑去社企「惜食堂」做義工。熱廚房位於柴灣工廠大廈內，唔少人會怕焗怕污糟，反而佢就話好鍾意，事關佢從小出入爸爸間工廠，自稱係半個「廠佬」喎！
陳光明（左）走入熱廚房做義工，董愛麗陪佢一齊刨瓜皮。
入到廚房，Johnny二話不說捲起衫袖刨瓜皮、洗菜。轉過頭，見到大廚炒麵炒到香噴噴，佢立即又走埋爐頭示範兩招「拋鑊」絕技，有板有眼。原來陳爸爸係超級食家，不時請來城中星級大廚到家中煮幾味，耳濡目染下，Johnny都煮得兩味。眨吓眼，一千個午餐飯盒出爐。半日義工功德圓滿，佢話滿身充滿正能量，好開心，稍後會呼籲更多朋友及邊緣青少年，加入義工團隊。
「惜食堂」創辦人Gigi董愛麗話，除熱心員工外，佢哋每日需要約二十個義工幫手，呼籲更多有心人加入，或者慷慨捐助食物。
