昂坪360董事總經理邵信明平日坐高空纜車就坐得多嘞，但本月二十三號佢會轉戰海上運動，事關佢已報名參加香港國際龍舟邀請賽嘅「名人扒浴缸比賽」。佢尋日出席龍舟賽記者會時，就率先公開參賽嘅秘密武器，唔止保證唔會反「缸」，仲講笑話就算對手出動海豚做隊友都冇有怕喎！

原來邵信明口中嘅秘密武器，就係佢邀請咗暑假會到昂坪360表演嘅少林武僧做隊友，所以對比賽充滿信心。佢希望武僧到時會展示輕功水上飄嘅功力，將浴缸輕易咁「飄」去終點線，仲笑住話最想自己可以坐喺後面印印腳坐享其成。當日比賽除咗設有冠、亞、季軍之外，仲有「特色造型大獎」，惜髮如金嘅佢就唔肯削髮襯番隊友，但就話已密鑼緊鼓咁準備當日嘅服裝，尋日就先賣關子，話到時一定會畀驚喜大家喎。

第一手消息請下載on.cc東方互動iPhone/iPad/Android/Windows Phone Apps