政壇：「私處中心」淪笑話西九跪低擬改名
設計圖片及對白
爆出嚴重超支二百五十億元嘅西九文化區是非一籮籮，之前因為「戲曲中心」嘅英文譯名「Xiqu Centre」，畀網民嘲諷為「私處中心」，淪為國際笑話，當時西九管理局表演藝術行政總監茹國烈仲企硬話唔會貿然改名。不過，事隔四個月西九管理局終於跪低。
設計圖片及對白
申用海濱長廊個人免問
今年一月有心水清嘅網民發現西九文化區，將戲曲中心用咗普通話拼音「Xiqu Centre」做英文譯名，畀人狠批佢媚共賣港，當時茹國烈仲死撐，話唔同地方對「戲曲」都有唔同譯法，仲話改名係嚴肅嘅事，唔會貿貿然咁做喎！
言猶在耳，西九文化區管理局諮詢會就突然建議討論戲曲中心嘅英文譯名，話「Xiqu Centre」呢個名引起咗學術界、文化藝術界嘅廣泛議論，有表演藝術委員更提出擔心操英語人士會唔明同唔識讀「Xiqu Centre」個名，又指「Xiqu Centre」個名只係推展項目時嘅臨時名稱，並持開放態度願意考慮改為「Chinese Opera Centre」、「Chinese Traditional Theatre Centre」等名稱，管理局諮詢會仲會喺下星期二，即係六月四日呢個敏感時刻開會討論。
另外，諮詢會又建議喺西九用地主要建築工程開展前，開放西九海濱長廊一帶嘅臨時用地畀牟利或非牟利機構申請使用，但個人申請就免問，唔知係咪因為上次租過畀人搞婚宴備受批評，所以今次特別小心處理呢？
