分拆教材照加價 港產官僚又跪低
大事做不成，小事做不了，港產官僚志大才疏，眼高手低，可以講係撞板多過食飯。呢，港府整色整水要求出版商分拆教材，聲稱可以令書價下調喎，結果又點呢？對唔住，教材就分拆咗喇，之但係書價就不減反加，你話係咪搞笑吖！
講起分拆教材，簡直一匹布咁長，由前朝貪曾政府講到現屆政府，足足講咗幾年先至成事。教育局仲沾沾自喜咁話，雖然下學年整體書價比去年上升百分之三點二，但升幅低於通脹喎，言下之意，即係自己好大功勞咁話。唉，分拆教材後書價不減反加，仲好意思邀功，面皮厚過牛皮，都唔知好笑定好嬲。
其實，所謂加幅低於通脹，只係數字遊戲咋。本報調查發現，撇除約四成教科書凍價，其餘六成加價，平均加幅約百分之四，最高加幅更達百分之七點四，跑贏通脹幾條街。仲有呀，同一科目嘅教科書，售價相差十萬八千里，以初中中文教科書為例，最平一套售六百一十八元，最貴一套索價一千一百二十八元，相差高達八成，問你怕未。
書商獅子開大口，例牌又係搬出通脹做擋箭牌。佢哋話喎，通脹令成本劇增，加上學生人數持續減少，而且新高中選修安排令課本需求量受到雙重打擊，所以分拆後課本售價難以下調云云。嗱，呢啲咪叫欲加之價，何患無辭囉。冇辦法喇，政府無能，書商無良，家長除咗任人宰割，仲可以點做吖！
講開又講，教育局當初實牙實齒承諾實施「分拆定價」，點知去年突然轉軚，容許學校向出版商免費索取教師用書，同以前根本冇分別，到頭來教師用書嘅成本咪又係照樣轉嫁畀學生家長，拆完等於無拆，搞來搞去得個吉，簡直嘥氣。
係人都知，書商之所以飛擒大咬，皆因市場壟斷，有恃無恐。其實，港府只要倣效內地或者日本等其他地方，由政府統籌出版教科書，統一定價，咁就唔使年年睇書商面色，任人予取予求喇。明明可以一勞永逸解決問題，港產官僚偏偏要捨易取難，一時分拆教材，一時搞電子教科書，根本就係做騷敷衍民意。
十年樹木，百年樹人，港府連教科書都搞唔掂，仲講乜嘢百年大計吖。咪話太一叮唔提醒，今時今日百物騰貴，民生艱難，如果當局繼續坐視書商魚肉學生，遲早激起民怨，盞冇運行嘅咋，叮！
