政壇：五議員棄外訪 留港打拉布戰
設計圖片及對白
立法會審議財政預算案撥款拉布戰已經超過一個禮拜，但大量修訂只係審議咗幾項，撥款案可以喺政府臨時撥款用盡前通過嘅機會真係微乎其微，立會亦陷入剪布無期、會議更無了期嘅混亂中，呢個風頭火勢下，建制派議員只能死頂做救火隊，有啲更要放棄另一啲公務，譬如新一屆港區人大代表原訂十七日出發往粵西考察，現屆立法會中，有五名議員身兼人大身份，其中一個吳亮星（星爺）尋日就講到明：「我連名都冇報，打定輸數喇，無謂到時嘥人心機同資源！」
設計圖片及對白
粵西考察 唔敢報名
呢個考察團係新一屆港區人大代表第一次公務外訪，本月十七日出發，地點係粵西茂名、湛江等地，考察為期四至五天，做得人大代表，呢啲本來係公務之一，但五名人大議員卻多數要留港撲火，事關政府講到明月中係限期，因各部門嘅臨時撥款用盡，到時好多政府服務都受影響，仲預告可能要緊急商討解決辦法，如果十七日五名人大議員離隊，立法會嘅形勢真係危危乎。
五名雙料議員包括星爺、田北辰、廖長江、馬逢國等，擁有「雙重身份」嘅星爺話，因為立法會拉布戰持續，佢一早評估過應該去唔到今次考察團，所以索性連報名都慳番，費事浪費晒有關方面嘅心機。星爺再三強調，自己都想做多啲國家事務工作，但基於大局為重，亦唔可以唔處理好屬於香港本位嘅工作。除咗做議員嘅人大代表外，首次當選人大嘅新界社團聯會理事長陳勇亦可能無法參加，事關佢早於半年前應承出席有份籌辦嘅城市大學校友組織「城賢匯」陝西之行，由於粵西考察團同陝西之行都係本月中舉行，惟有兩者揀其一。
