醫生左右不分 公院無奇不有

男女老幼，前後左右，三歲小朋友都識分。估唔到才高八斗嘅杏林精英，居然連呢啲基本常識都搞錯，唔怪得有人話，家陣幫襯公立醫院要攞命博咯。

公立醫院舊年第四季又有二十五宗重大醫療事故，當中二十二宗屬藥物事故。總而言之，醫院管理局最新一期《風險通報》簡直就係「醫界奇譚錄」，無奇不有，淨係左右不分嘅大烏龍，已經有兩單。

一名患小腸氣嘅三歲女童需要接受修補手術，本來應該喺左腹股溝注射麻醉藥，打針嗰位實習醫生竟然打錯右邊，好彩及時發現補救，手術最終順利完成；另一單失誤同樣匪夷所思，腎石病人要移除尿導管，結果應除左邊嗰條冇除到，反而除咗右邊嗰條，咁都會搞錯，直情係九唔搭八。

查實，左右不分嘅醫療事故喺公立醫院見怪不怪，幾乎每期《風險通報》都整番一兩劑。除咗左右腎唔識分，左右手、左右眼、左右乳房一樣搞錯，家陣公院醫生做手術，愈來愈似盲俠賣武，唔搞出人命算行運，你話唔驚就假，叮！

提起公立醫院醫療事故，仲有一樣「招牌菜」。冇錯，就係做手術有嘢送，將病人身體當「雜物櫃」，乜都塞入去。呢次一樣唔例外，即管睇下有乜送。

有病人要接受右結腸切除手術，腹部接駁咗一條矽膠管引流血水及分泌，其後由實習醫生分幾次掹喉，結果呢位醫生掹斷條喉都唔知，直到病人兩個月後腹痛入院至發現大鑊，一條長廿厘米嘅殘餘膠管留喺病人腹部足足兩個月 ；另一單烏龍涉及接受頸椎融合手術嘅病人，醫生喺頸椎植入金屬骨板，手術後助手問起，至發現有不必要組件未攞出，要第二日做緊急手術補鑊，最無辜就係病人，無情白事捱多一刀。其他「失物」仲包括紗布等等，無奇不有，問你點頂！

各位可能留意到，今次通報嘅醫療事故好幾單都涉及實習醫生出錯。雖然責任誰屬有待調查，但無論點都好，初出茅廬經驗不足嘅實習醫生頻頻出事，間接顯示前線人手嚴重短缺問題一直未解決。醫護人員不足唔係新聞，弊在醫管局關人個關，一拖再拖，根本就係攞病人生命較飛。

懸壺濟世嘅醫生竟然左右不分，睇怕要重讀幼稚園，由前後左右，男女老幼學起咯。不過咁，最需要補課嘅，首先就係醫管局班渾渾噩噩、得過且過嘅管理層，叮！