政壇：政商定格：葉劉踢爆貪湯應酬多
香港青年聯會賢慧社尋日舉辦「女性與政黨發展」午餐講座，搵咗行會及立法會議員葉劉淑儀主講。近期前廉政專員「貪湯」湯顯明嘅醜聞愈爆愈多，講過對呢位前下屬表現「好傷心」嘅佢，言談間不經意踢爆，話當年佢做保安局局長時嘅工作已夠晒忙，邊得閒招呼貪湯啲商界朋友吖，有時間都湊女好過啦！佢又語重心長話，當年已話過貪湯唔好咁多應酬喇！佢唔講，真係唔知貪湯十年前已咁識拉關係，唔怪得識到咁多商界高球波友，卸任廉政專員後仲撈到個全國政協委員做吓喇！
臨散場時，大會贈送一紙感謝狀畀佢，佢又忍唔住話送呢啲咪幾好囉，唔使送相機喇！咦，佢係咪寸緊貪湯送相機呢？
葉劉同賢慧社姊妹羅詠詩（右）、周沁（左）合照。