政壇：陳智思用英文宣揚愛國

愛國愛港再次成為政壇熱話，左派人士多次上晒子彈發炮，講明同中央反抗就一定唔係愛國者。行政會議成員Bernard陳智思去過好多國家玩，周不時都去美國，但偏偏喺佢嘅社交網站入面，除咗佢出席活動嘅相之外，所有旅遊相片都係喺內地影嘅，反映佢嘅社交網站係經過精心設計。

Bernard本身係番書仔，又係泰國華僑，雖然中文唔太叻，但唔代表佢唔熟悉國情，佢尋日喺社交網站，就貼咗去華山、洛陽，仲有西安兵馬俑嘅旅行相，清一色係內地富歷史味道嘅古城，唔係一般大城市，睇嚟佢都十分喜愛有五千年歷史嘅中國文化，仲唔係愛國嘅表現？

唔知係咪佢不諳中文嘅關係，所有相片都係用英文寫簡介，但其實亦可以掉番轉睇，佢嘅對象唔止係華人，而係識英文嘅人，用英文去推廣中國文化，同傳統嘅硬銷愛國好唔同。