Sun奇古怪：Sun潮語：左膠

依家啲人近日不斷討論「佔領中環」，話要爭取真普選，佢哋講到成個行動要斬雞頭、燒黃紙，又話今次係最後武器，仲要同政府「攬炒」玩鋪勁咁話，講到好似真係好勁咁；但其實香港喺好多年前，即係一九六七年曾經發生嘅嗰一場暴動，就真係驚天地、泣鬼神喇。

當時有一班信奉毛主席嘅「左仔」，受到大陸文化大革命影響，藉香港一單勞資糾紛，從中發動咗一場差啲令香港沒頂嘅「六七暴動」。當時佢哋佔領街道，同香港警察武鬥，又周圍放土製炸彈，炸死好多無辜市民。

潮語「左膠」，即係「左翼膠人」嘅簡稱；意思係指今日一啲思想左傾嘅年輕人，佢哋會信奉社會主義，用心研究馬克思、捷古華拉等社會主義代表性人物，認為只能透過實踐社會主義建立出嚟嘅理想社會，先至可以能夠體現出平等公義同人類嘅終極幸福。

佢哋有啲好自命清高，唔理人哋點講都會堅持自己嘅主張，就算人哋話佢哋錯，佢哋都要繼續堅持，令人覺得佢哋不切實際，亦因為咁就畀人形容做「膠人」。

呢班「左膠」同之前講嘅「左仔」其實係兩班人，佢哋並不屬於香港親中勢力嘅一分子、又唔係屬於淨心BB嗰類愛港力嘅人、又唔係嗰啲或者會因為蛇齋餅糉而盲目投票嘅無知一群。

至於本土左派，即俗稱的「土左」，其實係完全唔會研究社會主義，佢哋只係絕對服從阿爺意旨嘅奴隸。