Sun奇古怪：Sun潮語：潮文

最近，有位北京來港嘅後生女，因為一篇針對港產片《低俗喜劇》嘅藝評，攞咗藝術發展局一個藝術評論比賽金獎，鬧得滿城風雨。嗰篇藝評話該片醜化大陸人，其中由鄭中基飾演嘅廣西社團大佬一段戲，就將大陸人描繪成財大氣粗，熱衷人獸交並且推己及人嘅心理變態人士。仲話電影咁樣做法，係源於香港人恐懼強國崛起，所以唔抵得至拍啲咁嘅戲出嚟，從而獲得精神勝利。一時之間全城鬧爆，一時話賽果內定，一時又話港產片係香港地道文化，幾時輪到一個唔知頭唔知路嘅大陸人喺度說三道四？不過睇咗篇「金獎」影評之後，嗰篇嘢根本就唔係一篇影評，只係一篇觀點偏頗、視野狹窄、毫無藝術成分嘅低級政治評論、官樣文章，「潮文」都不如！

「潮文」呢個潮語，係指現時一啲文章，因為寫法、內容非常之大膽新潮，非常貼近潮流，所以稱嗰種文章為「潮文」。「潮文」有啲係小說式嘅古仔，有啲係散文式嘅隨筆，有啲係對一啲不合理嘅人或事聲討。「潮文」亦都無一定嘅字數長度、文法同格式，文字方面亦以潮語同網上用語為主，錯字、別字、數字、英文、中文鍾意點都得，總之表達到而睇嘅人明就得，最緊要係內容夠爆、夠過癮、夠好笑就可以一夜間被瘋傳。

「潮文」最先係出現於網上討論區，好多時內容抵死兼且一針見血，仲唔會咬文嚼字，貼近生活，所以比傳統文章更容易引發共鳴，以致令好多「潮文」經互聯網快速傳播。好多喺網上寫開「潮文」嘅網絡作者，已經成為真實寫作人，其網上作品亦已結集出書。「潮文」雖說不上係文學，但起碼都係一啲屬於香港本土嘅文化，得閒睇「潮文」，絕對有益身心過睇啲唔入流嘅影評吧！