政壇:陳振聰信耶穌 改名Peter

爭產不成搞到官非纏身嘅陳振聰忽然信耶穌一年後,四月準備受洗,正式成為神的兒女,佢近日發表「救恩見證」,慨嘆昔日沉迷風水賺取金錢財富,以為好靈驗,其實係中咗魔鬼嘅引誘。佢又大嘆「財富是虛幻」,聲言要做「新造的人」,呼籲大家以後喺街上見到佢,稱呼佢做Peter喎!

身世傳奇嘅陳振聰,信主經過都傳奇過人。佢話,去年三月家中司機Henry辭職時送咗本聖經畀佢,接過一刻,雙手好似中風般麻痹。後來經介紹認識林以諾牧師,定期返教會聽道,估唔到教友對佢好包容。有次佢參加一位來自非洲牧師嘅布道會,感動到跪喺地上成粒鐘,該牧師事後話佢知:「上帝已除去你嘅舊名,換上新名字Peter。」從此,教友都改口叫陳振聰做Peter。

回首過去,陳振聰直言人生曾窮過、有錢過、捱過,亦歎過,但一切已成過去。雖然覺悟前非,但佢因涉嫌偽造遺囑嘅官司,四月將喺高院開審,一旦敗訴,隨時淪為階下囚。面對官司佢心情平靜,話唔怕坐監,亦唔怕餘下人生路難行,因為佢已將自己交託咗畀神喎。

第一手消息請下載on.cc東方互動iPhone/iPad/Android/Windows Phone Apps

陳振聰(右)跟林以諾牧師信耶穌一年。(資料圖片)