政壇：廠商會春茗玩抽筋遊戲

中華廠商聯合會日前搞春茗，晚宴嘅抽獎項目係由各會董捐出，會長施榮懷（Irons）帶頭奉獻一萬元，而出晒名玩得嘅董事局成員當晚齊齊挑戰近日城中熱門嘅「一分鐘遊戲」，吳永嘉、徐炳光、楊志雄等副會長大戰「抽筋擒拿手」，玩法係要將鉛筆由手背拋起，然後喺半空中接住，筆嘅數目每次遞增。

大家玩得好肉緊，本來身手敏捷，都刻意「失靈」跌筆受罰，遊戲規則係贏咗冇獎，輸咗就要罰錢當抽獎獎品，啲副會長同會董都好識做，玩遊戲刻意失手等科水。常務會董沈運龍就開金口獻唱日文歌，各部門主管化身人肉樂器伴唱，氣氛好熱鬧。