SUN奇古怪：Sun潮語【和理非非】

有法律學者為爭普選，事先張揚要發動群眾「佔領中環」，希望可以有一萬人一齊堵塞中環主要街道，令香港經濟金融心臟地帶陷於癱瘓狀態，迫使政府實行真普選。提倡者仲形容，呢個係一個可以同政府談判嘅終極核武器。講真，香港貴為全球聞名嘅示威之都，集會遊行政總露營甚至堵路打邊爐都試過晒，咁玩法真係能夠成功爭取？依家好難預測。不過，睇番過往嗰班以白鴿黨為首嘅泛民黨派，嗰種崇尚「和理非非」嘅爭取模式，就知所謂核彈嘅威力，真係強極有限。

潮語「和理非非」，同 「想入非非」及「歐陽菲菲」係完全無關。 「和理非非」係指一種表達意見嘅方式，即係 「和平理性非暴力非粗口」嘅簡寫。

呢個係香港政壇好多人士，尤其係一啲泛民黨派經常嘅主張。就算要反對，要抗爭，要遊行示威，都要以 「和理非非」嘅方法去進行，要以唔影響其他市民生活為大前提，向政府表達不滿。好此道者，更加會抨擊其他目標一致但行為較激嘅人係激進派，加以口誅筆伐。當然，「和理非非」亦好受香港好多怕事怕痕又怕痛嘅廣大中產市民歡迎。結果係，每次遊行都係好似行禮如儀，連嗌口號都溫文爾雅，幾十萬人都可以靜英英，好多嚟自西方嘅人見到我哋呢種 「和理非非」嘅遊行，都忍唔住嘖嘖稱奇。因為換轉喺外國，幾十萬人示威足以令國家變天！

所以香港以「和理非非」爭取民主好多年，亦都試過就好多議題 「和理非非」地表達過不滿，不過咁又如何呢？正所謂，你有你遊行，佢有佢抓痕，意見接受，一切照舊。你會問，唔係咁可以點？唔通要學南韓學生當年咁日日掟汽油彈咩？抑或學利比亞嗰班人直程揸支槍去搶？咪玩啦！香港咁樣唔得……「和理非非」咪幾好？聽日仲要返工嘛？！