政壇：港台剪片屈人教壞細路

話說香港電台喺上周四農曆年初五播出《議事論事》節目時，社民連「長毛」梁國雄指摘愛護香港力量（愛港力）發言人陳淨心「係政權嘅一條狗」，逼到陳淨心反駁「我係咪建制關你叉事？」點知港台喺剪片時用咗「嘟」聲遮蓋咗個「叉」字，搞到外界誤以為陳淨心爆粗而被消音，當事人除咗飽受網民批評外，通訊事務管理局仲喺節目播出後收到四百八十三宗投訴，今勻真係水洗都唔清。

為以正視聽，愛港力尋日去信通訊事務管理局，投訴港台誤導觀眾，嚴重損害愛港力同陳淨心嘅形象，要求通訊局認真跟進外，港台亦應摯誠向陳淨心道歉以還清白。愛港力仲投訴港台唔公平對待嘉賓，事關長毛都有侮辱陳淨心「係政權嘅一條狗」，會對兒童有惡劣示範，但港台竟然冇剪走條片，反屈陳淨心爆粗，令人遺憾。