周中：搖吓知真假

【本報訊】化學豉油恐已流入市面，市民為免誤食化學材料，購買豉油時可先搖一搖，煮後聞一聞，有助辨真偽。名廚周中指出，化學豉油內並沒大豆成分，雖然顏色及香氣幾可亂真，但化學豉油搖晃後雖然也有泡沫，但十多秒便會消失，反之真豉油的泡沫會維持一段長時間才消失；而化學鼓油經烹煮後，只會剩下鹹味，全冇香味。

周中教路，搖吓就知真與假，「真豉油，有大豆等有機物，大力搖佢，就會起泡，假豉油就得化學品，點搖啲泡都唔會多，同埋啲泡會好快冇晒。」

他又指，煮食後，化學豉油亦有機會現形，「主要係豉油味，真豉油，你煮完都仲係好香，但係化學嘢一煮完，因為啲化學香味高溫後會揮發變質，香味就會走晒，得番鹹味。」