SUN奇古怪：Sun潮語【沉船】

十月一日晚上煙火漫天，然而一場沉船意外─南丫島海難，導致39人魂斷大海，係香港人難以釋懷嘅港殤。近日當局已經就事件開始進行聆訊，期望能查出事件真相，還死者一個公道，避免同類事情再次發生。

提到沉船，其實「沉船」本身都係潮語之一。不過就唔係實際有隻船沉咗落海咁解，亦唔係一般俗語「搭沉船」嘅意思。「搭沉船」嘅意思係本來一班人或者一個團隊好哋哋運作，突然間有人加入之後，就令到整個團隊突然出事，做乜衰乜；又或者指喺賭枱上，本來大家贏得好哋哋。但自從唔知邊個黑仔王加入大隊搭單落注之後，大家就由贏變輸，呢個「黑仔王」就係所謂「搭沉船」。

潮語「沉船」嘅意思就有所不同，呢個潮語係同男女關係有關。是咁的，如果一個有婦之夫或者有女友嘅男人，走去拈花惹草逢場作戲，搞到畀人纏住唔放或者自己動咗真情，最後搞到妻離子散或遭女友拋棄，一失足成千古恨，呢個報應就稱之為「沉船」。

「沉船」雖然用嚟形容男人居多，但其實喺香港呢個男女平等嘅社會，女性都有機會「沉船」嘅，因為好多有男朋友或有老公嘅女性，都有機會因為種種原因，耐不住寂寞而去偷歡，最後搞到反艇「沉船」。

至於點解叫「沉船」，可能嚟自「一腳踏兩船」。因為如果你同時間有多過一個情人，會被稱為「一腳踏兩船」，身邊好友或損友通常會勸你：「一腳踏兩船？你因住遲早沉呀！」所以會唔會因此而變成潮語「沉船」？有待考究。不過，潮語「沉船」終歸係悲劇， 所以話做人……都係專一啲好。