致癌食油為患 把關疏懶靠害

俗語話，民以食為天。計太一叮話齋，今時今日，民以食為憂就真。魚有孔雀石綠、蛋有蘇丹紅、豬有瘦肉精、油有坑渠油、奶粉有三聚氰胺……大家咪以為內地先至係咁，香港亦唔好得幾多嘅咋。

嗱，食環署食物安全中心抽取三十九個食油樣本化驗，發現來自同一間糧油供應商嘅兩個樣本嘅苯並〔ａ〕芘含量同時超出國家標準及歐盟標準，另有兩個樣本就超出歐盟標準。苯並〔ａ〕芘係乜嘢？簡單講即係致癌物，問你怕未。

世界衞生組織早就將苯並〔ａ〕芘列為一級致癌物，曾經有人做過動物試驗，將呢種物質搽喺兔仔耳朵，結果短短四十日後，兔仔隻耳就生出腫瘤。試諗吓，呢種食油食落肚，結果會點呢？

既然苯並〔ａ〕芘咁可怕，港府係咪應該加多幾錢肉緊，多啲抽檢，嚴格把關呢？講起就好笑，當局查咗成個禮拜，仲未查清出事食油嘅來源同分銷情況，亦冇交代有關食油幾時開始出問題，市民食咗可以點樣補救，反而大派定心丸，話今次事件對公眾健康影響唔大喎，簡直九唔搭八。當年周一嶽聲稱食少少三聚氰胺唔會影響健康，點知人哋叫佢食一粒熊仔餅，佢即刻耍手擰頭。

最離譜嘅係，對於食油嘅苯並〔ａ〕芘含量，港府原來一直冇設定上限，亦即係無王管，今次破天荒抽檢，都係參考內地同歐盟嘅標準。老實講，咁多年來香港人都唔知食咗幾多毒油落肚。至於市民最關心嘅坑渠油問題，食安中心話喎，目前依然未有一種特定方法檢測。喂，內地都有辦法檢驗坑渠油啦，香港竟然做唔到，即係仲不如內地啫，失唔失禮啲吖！

港府對食物嘅把關漏洞百出，既冇準則，又懶得抽檢，甚至連跟進補鑊都做到甩甩漏漏，市民唔驚就假。大家都知啦，內地黑心食品層出不窮，應有盡有，香港柴米油鹽醬醋茶乜都靠晒內地，一個唔小心，好容易中招咋。

講到中招，其實都唔係新聞咯。喺「一國兩制」之下，幾乎係內地有乜嘢，香港就有乜嘢，一損俱損，一毒俱毒。

總而言之，中港兩地相濡以毒，想唔做東亞病夫都幾難，叮！