政壇：曾浩輝臨別好風騷

每逢香港爆發傳染病，市民總會見到衞生防護中心（CHP）總監曾浩輝醫生喺鏡頭前細心講解疫情，可惜呢位抗疫大將做到本月二十九號就正式向二十年官場生涯Say Goodbye。佢尋日同傳媒友好茶敍期間，全程春風滿面，妙語連珠，睇嚟真係無官一身輕喎！

力挺接任人

行年四十有五嘅曾醫生仲係寡佬一名，大家對佢嘅感情生活都十分好奇，可惜不論記者明查或暗訪，都只見佢孤身一人去動漫節掃貨，又或者喺快餐店食炸雞。被喻為「筍盤」嘅佢被追問擇偶條件時就爆出金句，話感情事要隨緣，唔似得去買電視同冷氣，「唔係我話要高清就高清，要三十六吋就三十六吋o架嘛」，引嚟全場爆笑。

唔好睇佢每次主持記者會都斯文淡定，其實都撞過板，試過將男仔講咗做女仔，又試過講錯熱線號碼，結果畀人打嚟投訴，但最難忘始終係○三年沙士爆發，因為當年成個香港陷入停頓，佢當時負責調查疫症源頭，試過因壓力太大而落淚。之後佢每年都會重返淘大花園，覺得依家已睇唔出疫症痕迹，可能市民都唔太想回憶呢段慘痛經歷。

未來佢會陪多啲家人，亦會去旅行同做義工，但就表明唔會加入藥廠或私家醫院，以免利益衝突，對做問責官員更係耍手擰頭，話性格唔適合。

政府尋日正式公布曾浩輝嘅接任人選，就係現任CHP監測及流行病學處主任梁挺雄，曾醫生大讚梁醫生資歷比佢更深，中醫藥、公共衞生、非傳染病皆有涉獵，相信CHP喺佢帶領下會更好。