SUN微博：打橫嚟講：貿發局大想頭，過河濕腳

上星期五，我在此欄指出香港會議展覽中心管理公司派個小先鋒李大姑出嚟，借捐贈「廚餘」名義，藉機放風，話甚麼會展中心展期飽和，地方唔夠用之類講話，其實是向政府施壓，欲佔奪旁邊灣仔運動場或政府大樓群作擴建之用，胃口不小。

當然，咁巨大花費公帑嘅「消費」，一定要(目及)實啦！尤其是「會展公司」幕後老細貿發局咁鬼祟，哈哈！全港只得本欄踢爆那李大姑的奸計後，今個星期一，輪到貿發局主席蘇澤光粉墨登場啦！

真係畀我睇穿咗，佢證實係想政府撥地畀佢哋起大樓，並希望外國企業想入中國前，該讓佢「過河濕腳」，從中先取利喎！

真反智！以現在的國情，你做外國佬，有機會直接向中國內地大官揸手，仲會唔會要畀你個小鬼抽水呀！傻o架咩？

香港貿發局當年起壇，原旨本為協助香港中小企的，家陣，點呢？淨係喺會展中心擺檔展覽，佢哋都年年加租金，讓人叫苦連天。請問，貿發局何時有關顧過本地的中小企呢？連一個小小的灣仔會展中心都管理不善，仲未計佢哋班友外訪的奢華使費吖！唔該審計署的朋友，去Check吓佢哋盤數先啦！唔係好覺佢哋有乜公布啫！

尤其是每年書展的收入成績，貿發局年年都話搞書展無錢賺，成百萬人入場都無錢賺，其他展覽咪死得！我哋想知書展盤數點獨立計出嚟，話畀大家知！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot