政壇：搞搞政：馬逢國肥佬西裝講拜拜

減肥瘦身唔係女性專利，立法會體育、演藝、文化及出版界議員馬逢國自爆早年係肥佬一名，體重更一度逼近二百磅，身體指標「滿江紅」，項項都超標，依家體重卻已回落到一百六十磅，弗晒嘅馬逢國笑笑口爆減肥秘訣，仲話好難斷尾嘅脂肪肝畀佢成功搣甩，連肥佬西裝都從此拜拜！

八年前為咗照顧患癌嘅太太而棄選立法會後，佢就走去檢查身體，一查即時嚇親，當時體重幾近二百磅嘅佢身體指標幾乎全部超標，愛妻心切嘅佢為咗唔想屋企再有人病，當下就決心減肥，除咗戒甩至愛嘅燒雞皮外，更日日跑步做運動，加上每餐食少啲，兩個半月即減二十五磅，比起好多女明星減得更快更健康，體重一年內已回復昔日光輝。

尋日天寒地凍，好多議員開會都喺西裝褸入面加件內膽保暖，只見馬逢國好自豪話件夾心外套已經着咗近二十年，就算之前肥到着唔落都唔捨得丟，皆因佢話自己懷舊又專一，連西裝同皮鞋都鍾意着舊嘅，話舊鞋好着啲喎。