政壇：人大選舉傳梁唐營角力

港區全國人大代表選舉快將舉行，今次共有五十二人爭奪三十六個人大席位，最近卻有風聲話屬於「梁粉」嘅人大參選人對個人選情騰騰震，擔心受累特首梁振英（CY）最近嘅僭建風波等，仲話人大選舉甚至出現「唐」、「梁」兩大派角力添，唔知忠實「梁粉」兼行政會議成員羅范椒芬會唔會感覺好大壓力呢？

今次選舉，有二十三人係競逐連任港區人大，如果呢二十三人都順利當選嘅話，即餘下只有十三個議席由二十九人爭奪，平均兩個幾人爭一席，最後六、七個席位勝負更可能只相差十多票，如果選舉出現「唐、梁」營之分，「梁粉」背景濃嘅參選人如羅范椒芬、胡曉明、行會成員查史美倫、工聯會榮譽會長鄭耀棠及理事長吳秋北等豈不是大事不妙？

咁啱得咁蹺，形容自己「處女下海」參選人大嘅「梁粉」胡曉明尋日話，CY喺山頂大宅僭建事件上肯拆肯認，係好過唐英年，所以唔擔心CY會影響佢嘅選情。不過，Herman同時又強調自己同唐唐家族好有緣，仲話爸爸胡法光同唐父唐翔千係好朋友，而自己同唐唐太太郭妤淺嘅家人都好熟添。