政壇：方志偉入港燈做董事

官場近年不斷有前途大好嘅政務官跳船，走去私人機構搵真銀，好過喺政府熱廚房煎熬，其中一個跳船者就係喺商海如魚得水嘅方志偉，尋日佢獲電能實業董事局委任做獨立非執行董事，同時係全資附屬公司香港電燈嘅董事，任命即時生效。

方志偉喺政府做咗二十五年，任內做過保安局、運輸局，又曾經駐外工作，先後做過紐約經濟貿易辦事處處長，○二年又去咗日本做香港駐東京經濟貿易首席代表。從日本返嚟冇耐，佢就離開政府，同年就去咗香港總商會做總裁，一直到二○一一年離開為止。

不過，方志偉離開總商會都曾經有啲小風波，事關佢係喺任期前提早走人，當時有啲風聲話佢其實係不歡而散。點都好，依家佢又搵到新戰場，而且港燈嘅工作唔少都要同政府拗手瓜，譬如電費調整同規管協議等，睇嚟方志偉有好多發揮空間。