政壇：鬍鬚曾借007遮醜

政府依家正就出年發表嘅施政報告同預算案進行諮詢，但財爺鬍鬚曾竟然唔修心養性去撰寫預算案內容，仲有閒情逸致拖住老婆去睇電影。

鬍鬚曾尋日喺網誌自爆，以前最鍾意同老婆咬住碌蔗睇午夜場，而前排趁禮拜日有個空檔，又同老婆拍拖睇咗新一套鐵金剛早場，仲話本來睇完之後早就想寫影評，但又怕「劇透」，所以忍到尋日至出網誌。

M被圍攻感同身受

喺美國長大嘅佢，話自細就追睇占士邦嘅系列小說，早就想像出超級特工007嘅形象，仲對六代嘅007逐一品評。跟住佢就提及劇情，話成套戲最令人印象深刻嘅，係軍情六處主管M出席下議院調查委員會聆訊時被議員圍攻嘅窘境，令佢感同身受（一笑）喎！

至於點解？大家心領神會啦！鬍鬚曾做咗咁多年財爺，年年都估錯數，但又冇吸取教訓，畀班議員鬧爆，佢當然對M感同身受啦！

講到最後，佢又刻意叫大家留意吓，今集電影冇再為007設計新嘅「神奇法寶」，佢揸住部舊跑車、拎住一支槍、一部無線電，最後憑住一把了無新意、平平無奇嘅短匕首殺死壞人。佢仲意有所指咁同大家講，其實喺現實世界中，「能夠真正解決問題」嘅，可能都係嗰把了無新意、平平無奇嘅短匕首。

老實講，鬍鬚曾以前喺發表預算案之前，慣用「狼來了」技倆，嚟壓低市民對「派糖」嘅期望，睇佢尋日咁講，唔通係想換個方法壓低市民嘅期望，為佢出年嗰份平平無奇嘅預算案搭定下台階？抑或係暗示佢揸住嗰把係生銹刀，已經冇新招可以紓解民困呢？