SUN奇古怪：Sun潮語【斯巴達】

「斯巴達」是古希臘時期一個城市嘅名稱，佢係位於今日希臘半島南部。大家都可能從電影或書本得知，古時嘅斯巴達人同當今政務司司長一樣係非常之打得。斯巴達人亦有一段時期係以武力稱霸古希臘，建立咗霸權，直至後來被崛起嘅馬其頓人取代為止。咁點解一個古老地名無端端又成為咗潮語?呢個就係同我哋偉大嘅祖國有關。

吓?希臘咁遠又關中國事?無錯!就係同剛剛喺北京勝利閉幕嘅中國共產黨第十八屆全國黨代表大會，簡稱十八大有關。根據中國國情，每逢呢啲大會召開期間，全中國都要以最大力度維穩，以防出亂子，影響會議進行。除咗喺日常生活上，首都北京市市民受到影響之外，喺網上嘅監控更加比以往強化咗好多。例如好多字眼都唔能夠響網上出現，甚至 「十八大」本身都唔能夠喺中國嘅網上討論區隨意出現。中國網民有見及此，通常都會打所謂嘅 「擦邊球」，即係用一啲特別嘅方法，避過網上監控，讓想表達嘅嘢公諸於世。

最近因 「十八大」成為敏感詞，所以中國就有網民以 「斯巴達」代替 「十八大」，喺網上避過監察。因為普通話「斯巴達」嘅發音，其實同 「十八大」差不多。所以聰明嘅中國網民就係咁，避過咗具有中國特色嘅現代文字獄。

其實單單喺十八大，已經有好多大家唔喺太熟悉嘅潮語，包括 「裸退」，即係近二十年首次黨中央領導人真正卸任，唔再兼任中央軍委主席指點江山垂簾聽政。另外一個潮語係 「入常」，即係加入中共中央政治局常委咁解……一個十八大都咁多新嘢學，我相信大家都要畀心機了解學習中國國情先得!