政壇：搞搞政：郭家麒「撤」「徹」不分真失禮

立法會議員雖有尊貴議員之名，但質素卻一再亮起紅燈。繼建仔鍾樹根錯字、錯成語後，公文袋嘅郭家麒又成錯別字人辦，今次佢出嘅醜更大，事關佢前日拉隊到廉署示威，眾人展開一個有成個人咁高嘅橫幅，寫咗佢哋示威嘅訴求，要求廉署就沙田仁安醫院用地改建豪宅「撤查事件」，「撤」同「徹」雖然同音，但字義就差好遠，更有「撤回調查」嘅意思，唔通身為醫生嘅郭家麒係要求廉署唔好查？

查證之下，先知原來係手民之誤，郭家麒一行係要求廉署介入調查仁安醫院將近半醫院地皮改建豪宅一事，絕唔係撤回調查。堂堂醫生兼立法會議員，用字遣詞都應該小心啲好，畢竟學生、市民可能跟住學o架嘛，何況今次佢哋係大大個橫幅展示畀人睇。

或者泛民主派成日同政府打對台，咩政策都嗌「撤回！撤回！」，搞到郭家麒都撤上癮？今次公文袋咁認真拉隊去廉署示威，但就因一個錯別字搞到訴求都變晒樣，大狀、專才雲集嘅公文袋犯咁低水平嘅錯誤，真係冇眼睇咯！