政壇：女強人康橋泛舟傷腰
徐志摩《再別康橋》描述嘅美景令人神往，前政協常委、大慶石油公司嘅女強人鄭張永珍兩個月前到訪英國劍橋大學，見到旁邊嘅康河綠樹成蔭，詩意盎然，欲泛舟其上細賞如畫風光，點知當佢踏上小木船嗰陣，腰間突然強烈刺痛，手尾仲好長添。
經常滬港兩邊走嘅鄭張永珍當時匆匆結束訪英行程，去咗上海求醫，檢查後發現脊骨移位，傷勢都好嚴重。不過，好彩佢搵到一位好出色嘅推拿醫師，經過個多月嘅治療，情況已大有進展，雖然未完全康復，但已經毋須再用輪椅代步。日前佢就撐住拐杖去沙田馬場，呢次返港，除咗要為其愛駒打氣外，仲因為有業務要處理，兼且出席霍家長孫霍啟剛同跳水公主郭晶晶嘅世紀婚宴。