政壇：CY無酒請客歸咎貪曾

特首梁振英（CY）尋日喺行政長官粉嶺別墅花園，同中央政策組一眾全職及非全職顧問BBQ宴，點知中策組首席顧問邵善波冇帶酒招呼大家，CY喺別墅翻箱倒籠先搵到四支平價紅酒，只好四圍枱每枱供應一支，觥籌交錯間啲酒好快就飲晒。何解咁大間別墅只得四支酒咁少呢？莫非同我哋之前獨家踢爆貪曾卸任前喺禮賓府搬走咗大批酒有冇關係？

尋晚嘅活動，CY諗住收吓風睇吓大家對施政報告有咩意見，除咗全職顧問捧場外，四十六個非全職顧問都有三十人出席，當中唔少人都係第一次去粉嶺別墅。席上有羊扒、牛柳、金菇牛肉卷、燒豬頸肉等，美食應配靚酒，但CY喺別墅只搵到四支平價紅酒，每人半杯都唔夠分啦，CY惟有同大家講聲唔好意思。

我哋翻查資料，貪曾在任時都經常喺粉嶺別墅宴客，前年七月一次，去年就分別喺一月同五月都宴請過立法會議員同民建聯，個個都揸住杯酒滿場飛，今次冇酒都算不可思議。我哋之前獨家踢爆貪曾卸任前從禮賓府搬走大批酒，仲話多到要捐出嚟做善事，乜嘢原因佢有咁多藏酒真係懸疑，唔通貪曾搬走禮賓府嘅茅台酒都唔夠喉，連粉嶺別墅啲酒都唔放過？